Minkur úr Grafarholti heldur á vit forfeðra sinna

Íbúar við Grænlandsleið 1 vöknuðu upp við það í nótt að minkur var að reyna að troða sér inn um bréfalúguna. Hann var fældur á brott en íbúar urðu aftur varir við hann í morgun og upphófst mikill eltingarleikur um alla götuna. Hann náðist á endanum.

Yngsta kynslóðin hafði mikinn áhuga á dýrinu en kvörtuðu undan lyktinni sem því fylgdi. Ekki stóð þó til að halda minkinn sem gæludýr og var kallað á meindýraeyði borgarinnar. Minkurinn var ekkert allt of hrifinn af heimsókn hans.

Meindýraeyðir á vegum borgarinnar segir óvenjulítið um minka innan borgarmarkanna og telur að um 70 slíkir hafi náðst í ár en í meðalári eru þeir um hundrað talsins. Hann segir að minkurinn muni halda á vit forfeðra sinna.