Framsóknarmenn vilja stýrivaxtalækkun strax

Þingflokkur framsóknarmanna telur að fullar forsendur séu fyrir því að hefja lækkunarferli stýrivaxta Seðlabanka Íslands hið fyrsta. Þetta kemur fram í tillögum sem þingflokkurinn hefur sent frá sér. Þar er jafnframt bent á nauðsyn þess að Seðlabanki nýti sér heimildir Alþingis til töku

erlends láns sem allra fyrst til að efla gjaldeyrisforða Seðlabankans, styðja við fjármálakerfi landsmanna og auka trúverðugleika íslensks efnahagslífs.

Framsóknarmenn segja að alvarleg efnahagskreppa liggi í loftinu. Hún sé meðal annars tilkomin vegna alþjóðlegrar lánsfjárkreppu en einnig sé vandinn að miklu leyti heimatilbúinn. Íslensk stjórnvöld hafi enn ekki gripið inn í atburðarrásina með afgerandi hætti og fyrir vikið séu líkur á að kreppan verði dýpri og lengri en ella. Framsóknarmenn segja að trúverðugleiki efnahagsstefnu ríkisstjórnarinnar hafi beðið hnekki vegna yfirlýsinga sem ekki hafi verið fylgt eftir. Orðum hafi ekki fylgt efndir og því megi líkja við alvarleg hagstjórnarmistök.

Eftirfarandi eru tillögur þingflokks framsóknarmanna til aðgerða vegna þess ástands sem ríkir í efnahagsmálum

1. Þingflokkur framsóknarmanna telur að Seðlabanki Íslands verði að nýta heimildir Alþingis til töku erlends láns sem allra fyrst til að efla gjaldeyrisforða Seðlabankans, styðja við fjármálakerfi landsmanna og auka trúverðugleika íslensks efnahagslífs.

2. Þingflokkur framsóknarmanna kallar eftir því að ríkisstjórn og Seðlabanki komi fram með skýra áætlun um hvernig íslenskt þjóðfélag á að vinna sig í gegnum þá djúpu efnahagslægð sem þjóðin stendur frammi fyrir til að skapa trú og traust á stefnu þeirra sem fara með stjórn efnahags- og peningamála hér á landi. Seðlabankinn verður að auka gagnsæi ákvarðanatöku sinnar, m.a. með birtingu rökstuðnings fyrir vaxtaákvörðunum. Hafa ber í huga að Seðlabankinn er ekki aðeins

bundinn verðbólgumarkmiði heldur einnig því að stuðla að virku og öruggu fjármálakerfi og framgangi efnahagsstefnu ríkisstjórnarinnar.

3. Þingflokkur framsóknarmanna bendir á að samdráttur íslenska hagkerfisins virðist vera harðari og meiri en gert var ráð fyrir og því eru fullar forsendur fyrir því að hafið verði lækkunarferli stýrivaxta

Seðlabanka Íslands hið fyrsta. Þetta verði liður í þeim vegvísi sem ríkisstjórn og Seðlabankinn þurfa að opinbera fólki og fyrirtækjum.

4. Þingflokkur framsóknarmanna vill styrkja stoðir íbúðalánamarkaðarins. Endurfjármögnun Íbúðalánasjóðs á fasteignalánum fjármálastofnana verði til reiðu vegna lána undir ákveðnum fjárhæðarmörkum. Þannig er komið með félagslegum hætti að vanda tekjulægri hópa.

5. Þingflokkur framsóknarmanna vill að undirbúningi stórframkvæmda á vegum ríkis og sveitarfélaga verði hraðað þannig að hægt verði að ráðast í þær með skömmum fyrirvara. Horfa þarf sérstaklega til arðbærra framkvæmda sem hafa margföldunaráhrif á allt hagkerfið.

6. Þingflokkur framsóknarmanna ítrekar enn að ríkisstjórnin þarf að taka frumkvæði að nýrri þjóðarsátt með aðgerðum sem draga úr verstu áhrifum efnahagskreppunnar. Mikilvægar forsendur þess eru að ríkisstjórnin virki boðaðan samráðsvettvang stjórnarsáttmálans til samræmdra aðgerða stjórnvalda og atvinnulífs.