Seðlabankinn tjáir sig ekki um evruhugmyndir Björns

Enginn Seðlabankastjóranna þriggja vill tjá sig um hugmyndir Björns Bjarnasonar dómsmálaráðherra um að taka upp evru á grundvelli EES samningsins. Vísir leitaði eftir viðbrögðum frá þeim fyrr í dag en fékk þau svör að þeir hefðu ekkert við það að bæta sem þeir hafi áður sagt.

Á blaðamannafundi í dag sagði Geir Haarde hugmyndir Björns vera fjarlægan möguleika og taldi ráðamenn í Brussel hafa lítið álit á þessum hugmyndum. Undir það tók Percy Westerlund, yfirmaður fastanefndar framkvæmdastjórnar ESB gagnvart Íslandi, sem sagði það ómögulegt að Íslendingar gætu tekið upp evru á grundvelli EES.

Þá sagði Davíð Oddsson seðlabankastjóri á blaðamannafundi í Seðlabankanum, í september síðastliðnum, það vera sína skoðun að það væru fáránlegar hugmyndir að ætla að taka upp gjaldmiðil án þess að taka fullan þátt í starfsemi þess bandalags, sem stýrir gjaldmiðlinum.