Lýður leikstýrir dönskum stórleikara

Vestfirskir kvikmyndagerðarmenn hefja í sumar tökur á leikinni sjónvarpsmynd sem verður að mestu leyti tekin upp á Jökulfjörðum en einnig á Ísafirði.

Ríkissjónvarpið hefur þegar gefið vilyrði til sýninga og takist vel til er í bígerð að gera 8 þætti alls og sýna í sjónvarpi. Myndin byggir á dansk/íslenskum sögum úr samtímanum og gert er ráð fyrir að hver þáttur verði tæp klukkustund, eftir því sem fram kemur á vef Bæjarins besta.

Í tilkynningu sem aðstandendur verkefnisins sendu frá sér kemur fram að fyrsta myndin, sem ber titilinn Eitur í æðum, fjalli um lækni sem sé nýfarinn á eftirlaun og syrgi auk þess nýlátna konu sína. Hann ákveði því að stytta líf sitt og dveljist í þeim erindagjörðum í afskekktu sumarhúsi sínu. En fyrirætlun hans breytist snarlega þegar óvænta gesti beri að garði

Það eru engir B-mynda leikarar sem koma að gerð myndanna. Theodór Júlíusson fer með eitt aðalhlutverkið ásamt hinum danska Bjarne Henriksen sem lék í Forbrydelsen.