Hesthús á Ólafsfirði vekja áhyggjur íbúa

Fyrirhugað hesthúsahverfi í Ólafsfirði mætir harðri andspyrnu margra á staðnum. Núverandi hesthúsahverfi í Ólafsfirði stendur nokkuð fyrir innan kauptúnið. Samkvæmt nýju deiliskipulagi, sem meirihluti skipulags- og umhverfisnefnda Fjallabyggðar samþykkti, verður hverfið flutt vegna snjóflóðahættu að suðurenda flugbrautarinnar. Þar á það að standa um 400 metra frá íbúabyggðinni.

„Það svæði sem taka á undir þetta er mikið notað af fólki sem gengur þarna sér til heilsubótar og einnig hafa hundaeigendur mikið notað þetta svæði. Ljóst er að þessi tillaga skerðir mjög notkunarmöguleika svæðisins fyrir aðra en hestamenn,“ segir í mótmælabréfi til bæjaryfirvalda. „Bendum við á sjón- og einnig lyktarmengun sem við teljum að muni í ákveðnum veðuráttum ná til þeirra sem næst búa,“ segir í öðru bréfi.

Veiðifélag Ólafsfjarðar er á móti flutningi hesthúsahverfisins vegna nálægðarinnar við Ólafsfjarðarvatn sem er á náttúruminjaskrá. Félagið leitaði umsagnar Veiðimálastofnunar sem mælist til þess að haft sé um 100 metra frísvæði næst ám og vötnum. „Mikilvægt er að hanna hverfið með það í huga að ekki fari eiturefni frá hverfinu út í vatnið og lífræn efni verði brotin niður í rotþróm áður en þau fara út í stöðuvatnið,“ segir Veiðimálastofnun.

Skipulags- og umhverfisnefnd telur ekki að ástæða sé til að hafa áhyggjur af lyktar eða sjónmengun. Varðandi fullyrðingar um skerðingu á útivistarsvæði bendir nefndin á að hestamennska sé ein af vinsælustu fjölskylduútivistarafþreyingum á Íslandi. „Ekki er talin ástæða til að álykta að hestamennskan rýri útivistargæði svæðisins í heild, heldur geti hún verið afgerandi þáttur í að styrkja það,“ segir skipulagsnefndin. Samkvæmt skipulagsnefndinni verður hesthúsahverfið hvergi nær vatnsbakkanum en 50 metra. Það sé í samræmi við skipulagsreglugerð.

„Vandséð er að þessar framkvæmdir geti haft í för með sér áhrif á fiskigengd í vatninu, afkomu fiskistofna, aðstæður til veiði eða lífríki vatnsins að öðru leyti,“ segir skipulagsnefndin og áréttar að landrými í Ólafsfirði sé mjög takmarkað. „Því er ekki unnt að verða við tilmælum Veiðimálastofnunar í þessu tilviki um meiri fjarlægð frá vatni.“

Þá útskýrir skipulagsnefndin að ekki sé hægt að hafa byggingarnar fjær vatninu því húsin næst fjallshlíðinni séu eins nálægt snjóflóðahættulínu og leyfilegt sé.