Flagari Britneyjar gríðarlega vinsæll

Svo virðist sem bandaríska söngkonan Britney Spears sé ekki alveg af baki dottinn ef marka má viðbrögð við nýju myndbandi við lagið Womanizer sem útleggjast mætti á íslensku sem Flagarinn.

Eftir því sem erlendir miðlar greina frá hefur verið horft á myndbandið sjö milljón sinnum á Netinu á aðeins tveimur sólarhringum. Ekki liggur þó fyrir hvort hafi meiri áhrif, söngur yngismeyjarinnar eða myndir af henni nakinni í gufubaði í myndbandinu.

Af henni er annars það að frétta að Spears hyggur á tónleikaferðalag á næstunni þar sem kynna á nýja plötu hennar, Circus, sem kemur út í desember. Fjögur ár eru síðan hún túraði síðast en frá þeim tíma hefur hún glímt við mikla erfiðleika eins og alþjóð ætti að vera kunnugt.