Hætt við málssókn á hendur HB Granda

Verkalýðsfélag Akraness hefur í samráði við ASÍ ákveðið að hætta við fyrirhugaða málssókn á hendur HB Granda vegna uppsagna félagsins á Akranesi. Þetta kemur fram á vef ASÍ.

Þar segir ASÍ telji að mikilvægur árangur hafi náðst í málinu. Alls var um 60 manns sagt upp og sökuðu forsvarmenn Verkalýðsfélags Akraness og ASÍ HB Granda um að fara ekki að lögum um hópuppsagnir. Síðan sú gagnrýni var sett fram, hafa orðið umtalsverðar breytingar á afstöðu fyrirtækisins til málsins, að sögn ASÍ.

,,Þær breytingar birtast með skýrum hætti í því samstarfi sem nú hefur tekist með forsvarsmönnum HB Granda, trúnaðarmönnum, Verkalýðsfélagi Akraness og Vinnumálastofnun um endurmenntunar áætlun og ráðgjöf gagnvart þeim sem missa vinnuna þegar uppsagnir starfsfólks koma til framkvæmda. Viðkomandi starfsmönnum verður veitt aðstoð við atvinnuleit, aðgengi að viðeigandi námskeiðum, gerð ferilsskrár og greiningu áhugasviðs síns. Full ástæða er til að fagna þessu framtaki og því samstarfi sem tekist hefur, enda er það mjög í anda laganna um hópuppsagnir og markmiða þeirra," segir á vef ASÍ.

Þá er bent á að félag- og tryggingamálaráðherra hafi ákveðið að kanna í samráði við aðila vinnumarkaðarins hvort rétt sé að styrkja reglur um hópuppsagnir, þar með talið að skýra og taka af öll tvímæli um hvernig standa á að framkvæmd þeirra.