Svandís: Borginni ekki stjórnað vegna glundroða í Sjálfstæðisflokknum

Svandís Svavarsdóttir, oddviti Vinstri grænna í Reykjavík, segir það mikið áhyggjuefni að borginni sé ekki stjórnað vegna glundroðans í Sjálfstæðisflokknum.

Með þessu bregst hún við blaðamannafundi Vilhjálms Þ. Vilhjálmssonar, oddvita sjálfstæðismanna í borginni, fyrr í dag. Þar sagði Vilhjálmur meðal annars að hann myndi ekki hætta sem borgarfulltrúi en hann myndi íhuga stöðu sína á næstunni varðandi það hvort hann tæki við borgarstjóraembætti eftir ár.

„Það er mikið áhyggjuefni þegar borginni er ekki stjórnað vegna glundroðans í Sjálfstæðisflokknum, risminni blaðamannafund höfum við ekki séð: Forystan er ósýnileg, aðrir borgarfulltrúar hafa sniglast út og Vilhjálmur situr einn eftir. Fyrir liggur að Sjálfstæðisflokkurinn gerir Vilhjálm ekki að borgarstjóra en í flokki glundroðans liggur ekki fyrir hver getur tekið við. Á meðan er rekur borgin á reiðanum en við erum reiðubúin að taka við," segir Svandís á heimasíðu Vinstri - grænna.