Novator fagnar samningi um sölu á Fríkirkjuvegi 11

Novator fagnar því að meirihluti borgaráðs hafi samþykkt fyrir sína hönd kauptilboð félagsins í húseignina að Fríkirkjuvegi 11. Þetta kemur fram í tilkynningu frá félaginu.

Eins og fram hefur komið hefur staðið styr um söluna í borgarstjórn en samningur um söluna var samþykktur í borgarráði í dag. Í tilkynningu Novators segir einnig að það sé ósk félagsins að nú geti allir velunnarar þessa merka hús og Hallargarðsins sem um það liggur snúið bökum saman við uppbyggingu hússins og umhverfi þess.

,,Stórhýsið að Fríkirkjuvegi 11 er einstakt í íslenskri byggingasögu auk þess sem húsið tengist starfi og viðburðaríkri ævi Thors Jensens órjúfanlegum böndum en hann reisti húsið árið 1908, ól þar upp börn sín og bjó þar lengsta hluta ævi sinnar.

Novator hyggur á fjölbreytta starfsemi í húsinu þar sem sögu hússins og Thors Jenssens verður gert hátt undir höfði. Vonast félagið eftir góðu og farsælu samstarfi við borgaryfirvöld og borgarbúa alla við þá uppbyggingu sem laða mun almenning á nýjan leik að þessum fallega stað í miðbæ Reykjavíkur," segir einnig í tilkynningunni.