Óttast ráðningar hjá Orkuveitunni

Ólafur F. Magnússon, fyrrverandi borgarstjóri, telur óeðlilegt að ekki sé gefið upp hvaða 18 einstaklingar sóttu um stöðu forstjóra Orkuveitunnar. ,,Ég óttast mjög ráðningarferlið í höndum nýs meirihluta en það eru öfl í þessum flokkum sem virkjast á hinn versta veg þegar þeir ná saman í meirihluta. Fólk þarf að vera vel á verði núna."

Ólafur segir að setja megi mörg spurningarmerki við valið á Guðlaugi Sverrissyni sem stjórnarformanni Orkuveitunnar. ,,Er hann valinn vegna hæfni eða einhvers annars," spyr Ólafur.

,,Ég vil fá alla hluti upp á borðið varðandi Orkuveitu Reykjavíkur. Ég gagnrýndi það í þeim meirihluta sem lét af störfum í dag að illa hefur gengið að afla tiltekna upplýsinga í tengslum við fyrirtækið," segir Ólafur.

Ólafur vill opna stjórnsýslu Orkuveitunnar og kanna ferða-, risnu- og símakostnað með sama hætti og hjá borginni. ,,Fyrirtæki í eigu borgarinnar geta ekki verið undanskilin hvað það varðar frekar en önnur fyrirtæki í almannaeigu."