Árni Johnsen: Persónulegt skítkast

Árni Johnsen alþingismaður segist hafa lítið um væntanlega kæru aðstoðarvegamálastjóra á sig að segja. Gunnar Gunnarsson, aðstoðarvegamálastjóri, tilkynnti í dag að hann ætlaði að kæra Árna til lögreglu fyrir ummæli sem hann lét falla í grein í Morgunblaðinu í dag.

„Ég hef nú lítið um þetta að segja, þarna talar reiður maður sem fer út í persónulegt skítkast á mig," segir Árni í samtali við Vísi. „Þetta mál snýst ekki um það og það er vont þegar menn rugla saman samgöngumálum og lögfræðiflækjum." Árni segir að allt sem hann sagði í greininni byggi á réttum upplýsingum. „Gunnar, sem fulltrúi Vegagerðarinnar í nefnd sem átti að fjalla um samgöngumál Vestmannaeyinga sinnti ekki skildu sinni að mínu mati. Hann kann að hafa sínar skýringar á því en þessi vinna var ekki unnin faglega og hún skilaði ekki því sem hún átti að gera sem var að finna hagkvæmasta kostinn í stöðunni."

Árni segir að svo virðist vera að þegar nefndin starfaði hafi aldrei komið til greina að komast að annarri niðurstöðu en þeirri að höfn í Bakkavör væri besti kostur. „Jarðgöng eða nýr Herjólfur virtust bara ekki eiga að vera inni í myndinni," segir Árni og bætir við að slík vinnubrögð séu dónaskapur í garð Vestmannaeyinga og í raun skemmdarverk þar sem hagkvæmasti kosturinn í stöðunni hafi ekki verið valinn.

Aðspurður segist Árni ekki óttast málsókn Gunnars. „Kannski hefur hann ekki nægilega mörg verkefni hjá Vegagerðinni, ég veit það ekki, en gæfan fylgi honum," segir Árni Johnsen.