Guðjón Friðksson sakar Matthías um lygaþvælu

Guðjón Friðriksson sagnfræðingur sakar Matthías Johannessen fyrrverandi ritstjóra Morgunblaðsins um að birta ærumeiðandi lygaþvælu á vefsíðu sinni. Þar heldur Matthías því fram að Guðjón hafi verið hrakinn úr kennslu fyrir pólitíska einkunnagjöf.

Í dagbókarfærslu frá október 1998 skrifar Matthías um samtal við Jennu Jensdóttur rithöfund sem segir honum frá „útreið" sem ung stúlka, Jóhanna Eiríksdóttir, fékk hjá Guðjóni Friðrikssyni sagnfræðingi þá „tímakennara í Ármúlaskóla". Jóhanna þessi skrifaði ritgerð um verk Matthíasar - og fékk fjóra. Ritgerð sem samkvæmt Jennu var upp á níu. Málið á að hafa farið til fyrrum fræðslumálastjóra, sem talaði við skólastjórann sem kallaði inn allar ritgerðirnar og ritgerð Jóhönnu þá reynst vera upp á níu. Upp úr þessu hafi Guðjóni verið sagt upp og hrökklast síðan til Ísafjarðar.

Guðjón snýr færsluna niður í Morgunblaðinu í dag. Hann segist:

-aldrei hafa kennt Jóhönnu

-aldrei hafa kennt í Ármúlaskóla

-aldrei svo hann muni fengið ritgerð um ljóð Matthíasar

-aldrei verið sagt upp störfum við neinn skóla

Matthías hefur verið gagnrýndur fyrir að rjúfa trúnað við viðmælendur sína í stöðu ritstjóra voldugasta blaðs á Íslandi til áratuga með birtingu dagbókanna og þá vekur athygli að hann birtir sögur eins og þá um Guðjón án þess að leita staðfestingar.

Formaður Blaðamannafélags Íslands, Arna Schram, fagnar dagbókunum en segir hann verða að eiga við sína samvisku hvort hann sé að rjúfa trúnað. Telji menn að Matthías hafi brotið starfsreglur blaðamanna geti þeir leitað til siðanefndar félagsins.

Guðjón Friðriksson sagði í samtali við fréttastofu í dag að ef Matthías tæki færsluna ekki út af netinu, myndi hann leita til lögfróðra aðila og fara lengra með málið.