Af hverju að spila fyrir 6000 áhorfendur?

Harry Redknapp, stjóri Portsmouth, segir að félagið hafi neitað 12 milljón punda tilboði Monaco í króatíska landsliðsmanninn Niko Kranjcar. Hinn 23 ára gamli miðjumaður hefur verið orðaður við nokkur félög í Evrópu í sumar, en virðist ánægður í herbúðum Portsmouth.

Harry Redknapp gat ekki stillt sig um að senda franska liðinu pillu þegar hann var spurður út í tilboðið í miðjumanninn knáa.

"Monaco bauð um 12 milljónir punda í Niko en við vildum ekki selja hann og hann vildi ekki fara - og því varð ekkert úr því. Með fullri virðingu fyrir Monaco - af hverju ætti hann að vilja að fara þangað og spila fyrir framan 6,000 manns. Það er gaman að koma til Mónakó, en fólk þar er meira fyrir að fara flott út að borða en fylgjast með fótbolta," sagði Redknapp.