Fyrstu íslensku kartöflurnar komnar í búðir

Halldór Björnsson gæðastjóri hjá ávaxta- og grænmetisdeild Kaupáss segir að fyrsta uppskeran af íslenskum kartöflum í ár sé komin í verslanir Nóatúns. „Þetta eru premier kartöflur frá Eyrarbakka og við erum fyrstir," segir Halldór og bætir því við að yfirleitt séu mikil gleðitíðindi að fá fyrstu uppskeruna í hús.

„Nú fara íslenskar fjölskyldur út í búð og elda síðan ýsu með léttsoðnum glænýjum íslenskum kartöflum," segir Halldór en kartöflurnar komu í búðir nú eftir helgi.

Ekki er um neitt gríðarlegt magn að ræða en það bætist í eftir því sem líður á vikuna. „Rigningin sem hefur verið undanfarið hefur haft góð áhrif á þá ágætu bændur sem eru að rækta grænmeti úti."

Halldór segir að íslenskar kartöflur séu fáanlegar yfir árið um kring og ekki sé mikið flutt inn til landsins, en þó eitthvað.

„Svo er blómkálið líka komið og spergilkálið fer að detta inn ásamt rófunum."