Gullbyssu úr góðkunnri Bond-mynd stolið

Skammbyssunni gullslegnu, sem Christopher Lee brá í hlutverki skúrksins Scaramanga í James Bond-myndinni The Man With The Golden Gun árið 1974, var stolið í gær úr hirslu í Hertfordshire-myndverinu í Borehamwood, norður af London.

Lögregla rannsakar nú málið en byssan er metin á lítil 80.000 pund sem í núverandi efnahagsástandi gera rúmlega 15 milljónir. Það var Roger Moore sem fór með hlutverk breska njósnarans í annað skiptið í umræddri mynd en Sean Connery hafði þá sest í helgan stein eftir að hafa túlkað Bond í hinsta sinn í Diamonds are forever árið 1971.

Í myndverinu standa nú yfir tökur á nýjustu kvikmynd Nicholas Cage, Kick-Ass, og hefur fjöldi fólks því verið þar á ferð. Lögregla verst allra frétta af rannsókninni en gárungar benda henni á að gera húsleit heima hjá Christopher Lee sem túlkaði þrjótinn Scaramanga en sá hafði þrjár geirvörtur og drap andstæðinga sína með gullnum kúlum sem skotið var úr gullbyssu.