Ekkert óeðlilegt við að bílstjóri hafi réttarstöðu sakbornings

Hannes Ragnarsson sem lenti í umferðaróhappi á skoðunarstöð Frumherja á föstudag gagnrýnir vinnubrögð lögreglunnar í Fréttablaðinu í dag.

Þar segir hann m.a að lögregluþjónn hafi heimsótt sig þar sem hann lá á sjúkrahúsinu og tilkynnt sér að hann hefði réttarstöðu sakbornings í málinu. Margeir Sveinsson, fulltrúi í rannsóknardeild umferðarslysa hjá lögreglunni, segir ekkert óeðlilegt við það enda hafi Hannes valdið tjóni á öðru ökutæki.

„Það er skylda okkar að kynna aðilum hvort þeir hafi réttarstöðu sakbornings eða séu vitni í málinu, það er réttur allra að fá að vita það," segir Margeir en slysið bar að með þeim hætti að bensíngjöfin á bíl Hannesar festist niðri þegar hann ætlaði að bakk örstuttan spöl.

Hann kastaðist þá út úr bílnum og klemmdist á milli eigin bíls og annars sem stóð á verkstæðisgólfinu.

Magnús Þór Óskarsson skoðunarmaður hjá Frumherja brást skjótt við þar sem hann sá Hannes klemmdan á milli bílanna tveggja. „Maðurinn var orðinn blár og gat engan veginn andað," sagði Magnús í samtali við Fréttablaðið í morgun. Magnús fór þá að blása lífi í Hannes sem fór að sýna lífsmark eftir sex til sjö skipti.

Hannes er ósáttur með vinnubrögð lögreglunnar eins og fyrr segir og talar meðal annars um að bifreið sín hafi verið dregin í burtu óskoðuð á sinn kostnað.

„Það er ótímabært að segja til um hvort kostnaður lendi þarna eða hinum megin, málið er í skoðun og það er ekki tímabært að segja til um það," segir Margeir.

Margeir segir að ekkert óeðlilegt hafi verið í ferlinu þar sem Hannes er grunaður um að vera valdur að tjóni á öðru ökutæki.

„Þeir aðilar sem eru grunaðir um eitthvað refsivert athæfi eiga þann rétt að fá að vita hver staða þeirra er og þurfa ekkert að tjá sig um það. Við rannsökum málið en það kemur svo í hlut ákærusviðsins að skoða hvert framhaldið verður."