Kvótalausi sjómaðurinn aftur til veiða

Landhelgisgæslan reyndi fyrr í dag að hafa samband við sjómanninn Ásmund Jóhannsson frá Sandgerði sem aftur hefur haldið til veiða kvótalaus.

Ásmundur komst í fréttirnar í síðasta mánuði þegar hann fór út til veiða án kvóta en með þessu segist hann vera að segja kvótakerfinu stríð á hendur. Landhelgisgæslan hafði afskipti af honum þá og á hann yfir höfði sér kæru fyrir athæfið.

Þær upplýsingar fengust hjá vaktstöð siglinga nú í hádeginu að menn á vegum Gæslunnar hefðu flogið yfir bát Ásmundar í morgun þar sem hann var að veiðum norðvestur af Garðskaga. Reynt var að hafa samband við Ásmund en hann svaraði ekki kalli og segjast menn hjá Gæslunni ekki vita hvað Ásmundur muni gera. Hann þurfi þó einhvern tíma að koma í land og þá taki réttmæt yfirvöld á móti honum.