Ríflega 12% meiri sala af áfengi en í fyrra

Sala á áfengi í vikunni fyrir verslunarmannahelgi var rúmlega 12 prósentum meiri í lítrum talið en í sömu viku fyrir ári. Þetta kemur fram á vef Áfengis- og tóbaksverslunar ríksins.

Samtals seldust 783 þúsund lítrar af áfengi í ár en í sömu viku í fyrra seldust 698 þúsund lítrar. Aukning er einnig í fjölda viðskiptavina en 127 þúsund viðskiptavinir komu í Vínbúðirnar í vikunni fyrir verslunarmannahelgina en í sömu viku í fyrra komu 113 þúsund viðskiptavinir í Vínbúðirnar, þar af 44 þúsund á föstudaginn. Fjölgun viðskiptavina er því rúm tólf prósent eftir því sem segir á vef ÁTVR.

„Í Vínbúðinni í Vestmannaeyjum komu um 1400 viðskiptavinir föstudag og laugardag um verslunarmannahelgi í fyrra, en í ár heimsóttu um 2.100 viðskiptavinir Vínbúðina. Aukningin er því um 55% milli ára. Á Akureyri komu um 3.600 viðskiptavinir sömu daga fyrir ári en 4.300 í ár og er aukningin milli ára því um 20%," segir á vef ÁTVR.