Skurðstofur víða lokaðar í einhvern tíma í sumar

Sjúkrahúsin á suðvesturhorni landsins munu flest loka einhverjum af deildum sínum í sumar en þau hafa samræmt starfsemi sína í kjölfar samninga sem undirritaðir voru fyrr á árinu.

 

Á hand- og lyflæknisdeild Heilbrigðisstofnunarinnar á Selfossi verður dregið úr starfsemi og 15 rúm höfð opin. Skurðstofa verður lokuð í 7 vikur, frá 23. júní - 11. ágúst, og dregið úr skurðaðgerðum aðrar vikur sumarsins. Fæðingum fækkar á sama tíma og skurðstofa verður lokuð vegna skorts á skurðstofuaðgengi en sængurlegurými verða opin.

 

Þá verður skurðstofan á Heilbrigðisstofnun Suðurnesja lokuð í rúmar 6 vikur, frá 30. júní - 14. ágúst. Fæðingum fækkar á sama tíma og skurðstofa verður lokuð vegna skorts á skurðstofuaðgengi en sængurlegurými verður óbreytt. ,,Stefnt er að því að önnur starfsemi verði óbreytt en ekki hefur gengið að fá nægilega marga hjúkrunarfræðinga til starfa. Ef ekki rætist úr með mönnun hjúkrunarfræðinga þarf að loka hjúkrunar- og endurhæfingardeild í 4 - 6 vikur í sumar," segir enn fremur í tilkynningu frá sjúkrahúsunum.

Sumarstarfsemi Landspítala verður með svipuðu sniði og undanfarin ár. Fimm daga öldrunarendurhæfingardeildir verða lokaðar í 5 vikur hvor en önnur öldrunarrými verða opin. Þá verður dregið úr starfsemi á skurðstofum og skurðdeildum á skurðlækningasviði, barnasviði og kvennasviði þannig að skipulagðar skurðaðgerðir verða færri en allri bráðaþjónustu verður sinnt.

Á Akranesi verða lyflækninga- og handlækningadeildir reknar sem ein deild með 18 rúm frá 10. júní - 19. ágúst. Ein skurðstofa verður opin allt sumarið í stað tveggja yfir vetrarmánuðina. Dregið verður úr liðskiptaaðgerðum. Þær verða gerðar annan hvern mánudag en aðrar skurðaðgerðir eftir því sem legurými leyfir. Önnur starfsemi verður óbreytt.

Samdráttur er ekki fyrirhugaður í starfsemi Sólvangs en skurðstofur og handlækningadeild á St. Jósefsspítala verða lokaðar frá 7. júlí - 25. ágúst. Samdráttur verður á lyflækningadeildinni og hún rekin með 10 - 12 rúm í sumar. Samdrátturinn er meiri en síðastliðið sumar.