Vinstri - græn telja stokk að Ánanaustum óráð

Þorleifur Gunnlaugsson, fulltrúi Vinstri grænna á fundi borgarráðs í dag, lagði fram bókun þar sem fram kemur að flokkurinn telji það óráð að leggja stokk fyrir bílaumferð frá gamla útvarpshúsinu að Ánanaustum.

Í bókuninni segir að lagning Geirsgötu og Mýrargötu í stokk sé afar dýr leið og kosti Reykvíkinga á annan tug milljarða, fjármuni sem vel væri hægt að nýta með öðrum hætti nú þegar kreppir að í þjóðfélaginu og staða borgarsjóðs jafnt og reykvískra heimila hríðversni.

„Það er tímanna tákn að á sama fundi og meirihlutinn leggur til þessa rándýra leið er lögð fram tillaga um það að skera niður þjónustu Strætó bs. Þjónustu sem þvert á móti þarf að stórauka til að gera borgina lífvænlegri og samgöngur ódýrari," segir í bókuninni. Vinstri - græn segja enn fremur að það sé liðin tíð að einkabíllinn eigi rétt á því að fara alls staðar óhindrað um, hratt og ávallt á kostnað annarra ferðamáta.

Jafnframt lagði Þorleifur fram fyrirspurn um það hvernig meirihlutinn hygðist fjármagna stokkinn og hver yrði kostnaðarþátttaka ríkis og einkaaðila. Enn fremur benti hann á framkvæmdir við Tónlistar- og ráðstefnuhús væru komnar vel á veg. „Gera má ráð fyrir því að ýmsar framkvæmdir tengdar núverandi umferðalausn séu í gangi eða þeim lokið. Verði af fyrirhugaðri lagningu stokks frá Geirsgötu í Ánanaust má búast við því að hluti þeirra framkvæmda hafi verið óþarfar. Sé það raunin, hversu mikið fé hefur þá farið í súginn ?" spyrja Vinstri - græn.

Jafnframt lagði flokkurinn fram tillögu um að metnir yrðu allir kostir umferðalausna frá Geirsgötu í Ánanaust með tilheyrandi skipulags- og umhverfismatsvinnu. Þar er meðal annars átt við lausnir eins og stokka, göng og brýr frá Geirsgötu út í Ánanaust eða Granda.