Beitir sér ekki fyrir auglýsingabanni í kringum barnatíma

Þorgerður Katrín Gunnarsdóttir menntamálaráðherra hyggst ekki beita sér fyrir lagasetningu sem bannar auglýsingar í kringum barnatíma í sjónvarpi. Hún treystir fjölmiðlum og foreldrum til þess að meta hvað er best fyrir börnin.

Ásta Ragnheiður Jóhannesdóttir, þingmaður Samfylkingarinnar, vakti á Alþingi í dag athygli á málþingi sem fram fór í síðu viku. Þar hefði komið fram að Ísland yrði að innleiða nýja sjónvarpstilskipun frá ESB. Þá hefði einnig komið fram að stór hluti auglýsinga í kringum barnatíma væru auglýsingar á skyndibita og óhollustu og að slíkar auglýsingar væru algengari í Ríkissjónvarpinu en Stöð 2.

Benti Ásta á að nágrannaþjóðir hefðu tekið á þessu meðal annars vegna vaxandi offitu hjá börnum. Þannig bönnuðu Svíar og Finnar slíkar auglýsingar í kringum barnatíma og Danir hefðu strangar reglur. Þá vísaði hún til þess að útvarpsstjóri hefði lýst því yfir að það myndi ekki breyta neinu fyrir RÚV að hætta að auglýsa á þessum tímum. Spurði Ásta því ráðherra hvort hún hygðist beita sér fyrir því að Ríkisútvarpið, sem heyrði undir menntamálaráðuneytið, auglýsti ekki óhollustu á þeim tímum sem börn horfðu á sjónvarp.

Þorgerður Katrín Gunnarsdóttir menntamálaráðherra sagðist í haust myndu flytja fjölmiðlafrumvarp á þingi sem myndi snerta mjög tilskipun ESB. Í hinum nýju fjölmiðlalögum yrðu hins vegar ekki lagaákvæði sem bönnuðu auglýsingar í kringum fjölmiðla. Hún myndi láta fjölmiðlum það eftir að taka ákvarðanir í málinu.

365 hf. ætlaði ekki að breyta þessu hjá sér en það gilti annað um RÚV. Sagðist hún vilja taka það upp í tengslum við samning RÚV og menntamálaráðuneytisins og hún myndi ræða málið við útvarpsstjóra. Þorgerður sagði enn fremur að það ætti að treysta foreldrum að meta hvað væri best fyrir börnin.