Vilhjálmur ráðfærði sig við fyrrverandi borgarlögmann

Vilhjálmur Þ. Vilhjálmsson, formaður borgarráðs, neitar að hafa orðið tvísaga varðandi kaupréttasamninga tengdum REI málinu þann 4. október annars vegar og 8 október, eins og fullyrt hafi verið í Kastljósi. Hann segist jafnframt hafa rætt um umboð sitt við fyrrverandi borgarlögmann. Þetta kemur fram í yfirlýsingu sem Vilhjálmur sendi frá sér rétt í þessu.

Vilhjálmur segir að hann hafi mótmælt fullyrðingum um tvísögli og sagt að snúið hafi verið út úr orðum sínum. „Spyrjandi Kastljós hélt öðru fram. Eftir að hafa skoðað málið nánar, kemur í ljós að ég hafði rétt fyrir mér og hafði ekki orðið tvísaga, eins og stjórnendur Kastljóss hafa viðurkennt. Sömu stjórnendur hafa lofað að birta leiðréttingu vegna þessa í kvöld. Í sama viðtali talaði ég um ráðgjöf borgarlögmanns. Þar átti ég við fyrrverandi borgarlögmann, sem taldi að ég hefði umboð til að taka þessa ákvörðun sem fulltrúi eigenda. Í áliti núverandi borgarlögmanns á bls. 5 kemur fram að borgarstjóri hafi stöðuumboð til að taka ákvarðanir fyrir hönd eigandans, Reykjavíkurborgar, á aðalfundum og eigendafundum OR," segir í yfirlýsingu Vilhjálms.