Ólympíufáninn dreginn að húni á Laufásvegi

Ian Whitting, breski sendiherrann á Íslandi, mun draga fána ólympíuleikanna að húni við bústað sinn að Laufásvegi 33 klukkan 12 í dag.

Þetta er gert að því tilefni að leikunum lýkur í Peking í dag en þeir munu næst fara fram í London árið 2012.

Fáninn verður dreginn að húni á yfir 400 stöðum í Bretlandi, auk breskra sendiráða víðsvegar um heim.

Borgarstjóra Lundúna, Boris Johnsson, verður afhentur fáni leikanna við lokaathöfnina í Peking, sem markar upphafið að sumarleikunum í Lundúnum 2012.

Sebastian Coe, formaður skipulagsnefndar fyrir leikana í London, segir daginn merkan áfanga:

"Þegar borgarstjóri Lundúna tekur við ólympíufánanum í dag munu augu manna beinast að Lundúnum og Bretlandi sem næsta landi sem mun hýsa leikana.

Þetta er mjög spennandi tími og við viljum að sem flestir geti verið með okkur. Það var stór stund þegar Rauðu örvarnar flugu yfir Travalgar torg í júlí 2005 þegar tilkynnt var um leikana í London. Konunglegi breski flugherinn verður aftur í stóru hlutverki í dag, þegar augu heimsbyggðarinnar beinast að London eftir að leikunum lýkur í Peking."

Við athöfnina safnast tugir þúsunda saman við The Mall og fagna.

Fram koma fjölmargir listamenn og skemmtikraftar, má þar þar nefna The Feeling, Il Divo, Katherine Jenkins, McFly, Will Young, James Morrison, Scouting for Girls, Sophie Ellis-Bextor, Heather Small.

Nánar má lesa um dagskrána á www.london2012.com