Ramses hlakkar til að sameinast fjölskyldunni

Paul Ramses er mjög ánægður með úrskurð dóms-og kirkjumálaráðuneytisins um að mál hans muni aftur verða tekið til umfjöllunar hjá Útlendingastofnun. „Ég er mjög ánægður með þessa viturlegu ákvörðun. Mig langar bara að þakka þeim fyrir en mig langar einnig að þakka öllu því fólki sem hefur verið að biðja fyrir okkur," segir Paul Ramses.

Mig langar einnig að þakka fjölmiðlum, þeir hafa verið virkilega almennilegir, hringt bæði í mig og konu mína, spurt um líðan Fídels Smára, hvatt okkur áfram og óskað okkur velfarnaðar. Það er mjög mikilvægt að heyra slíkt."

„Ég hlakka mjög til að sameinast fjölskyldunni. Ég er mjög þakklátur öllum þeim konum sem hafa hringt í konuna mína og stutt hana, konur spila mjög mikilvægt hlutverk í lífum okkar án þess að við séum nægilega meðvituð um það."

„Þegar maður hefur upplifað ófrið eins og er nú í landi mínu, þegar maður hefur upplifað ástand þar sem börn eru drepin og konum nauðgað getur maður ekki annað en verið þakklátur fyrir slíka umhyggju."segir Paul.

Paul Ramses segist vera mjög létt að vera að komast til Íslands þar sem aðstaðan á Ítalíu sé ekki upp á marga fiska. Hann var fluttur á nýjan stað fyrir tveimur vikum þar sem hann þarf að fara út kl. 9 á morgnana og fær engar máltíðir.

Á nýja staðnum þarf einnig að taka allan farangur með sér út á daginn svo honum sé ekki stolið. „Því hlakka ég mjög til að eignast aftur líf á Íslandi," segir Paul að lokum.