Segir misskilnings gæta um hlutverk Valtýs og Boga

Björn Bjarnason dómsmálaráðherra segir misskilnings gæta um hlut Valtýs Sigurðssonar ríkissaksóknara og Boga Nilssonar, fyrrverandi ríkissaksóknara, um að verkefni þeirra sé að rannsaka eða stjórna rannsókn einstakra mála, sem kunna að spretta af hruni bankanna og vísað er til lögreglu.

Í Kastljósi kvöldsins var rætt um óheppilega ættartengsl þeirra Valtýs og Boga en margir þingmenn telja þá vanhæfa til verksins. Þeim hefur verið falið það verkefni að vinna skýrslu um hrun viðskiptabankanna þriggja og hvort tilefni sé til lögreglurannsóknar. Sonur Valtýs er m.a forstjóri Exista, stærsta hluthafa gamla Kaupþings en sonur Boga er m.a forstöðumaður lögfræðisviðs Stoða.

Björn segir málsmeðferðina tvíþætta. „Í fyrsta lagi að kortleggja stöðuna, átta sig á umfangi og stofna til tengsla við þá, sem þegar eru teknir til við að rannsaka einstök mál, án þess að um lögreglumál sé að ræða. Þetta starf er að fara af stað. Ríkissaksóknari telur, að líklega þurfi erlenda sérfræðinga til að átta sig á öllum þráðum til að heildarmyndin fáist. Hann hefur kynnt málið fyrir allsherjarnefnd alþingis," segir Björn á heimasíðu sinni í kvöld.

Í öðru lagi segir hann verkefni þeirra félaga að rannsaka einstök mál í samvinnu við lögreglu. „Hugmynd mín er, að þarna komi sérstakur saksóknari til sögunnar og er frumvarp um hann á lokastigi í vinnslu á mínum vegum. Hvert skref, sem stigið hefur verið í þessu máli, hefur verið kynnt á opinberum vettvangi. Ríkissaksóknari kynnti hugmynd um kortlagninguna, ég samþykkti hana og skýrði fyrst frá henni á alþingi. Ég lít á hana sem nauðsynlegan og tímabæran undirbúning undir sakamálarannsóknina sjálfa, verði efnt til hennar, og viðleitni til að búa skipulega í haginn fyrir hana, einfaldlega til marks um vönduð vinnubrögð."