Þokan gerir borgarbúum grikk

Íbúar höfuðborgarsvæðisins voru nokkuð óánægðir með veður helgarinnar en í stað hitabylgjunnar sem veðurfræðingar höfðu lofað var þoka og svalt loft í aðalhlutverki. „Strendurnar hafa lent í þoku en við því er að búast þegar hár hiti er yfir landinu. Því var spáð að þokuloft yrði meðfram ströndum sem er það sem Reykjavíkin hefur þurft að þola," útskýrir Sigurður Þ. Ragnarsson, veðurfræðingur með meiru.

Sigurður segir að lognið hafi verið versti óvinurinn undanfarna daga, því það vanti hræringu í kerfið til þess að koma golunni á hreyfingu. „Það vantar samt eingöngu herslumuninn og því gæti rofað til á höfuðborgarsvæðinu."

Borgarbúar ættu reyndar að nýta sér tækifærið og skella sér út fyrir borgarmörkin enda segir Sigurður að ekki þurfi að fara mikið meira en tíu kílómetra frá borginni til þess að hækka hitastigið um heilar tíu gráður. „Hver vegur að heiman er vegurinn heim en hver vegur að heiman er þroskandi," sagir Sigurður glaður í bragði að lokum.