Þingkosningar í Austurríki og Hvíta-Rússlandi

Austurríkismenn og Hvít-Rússar kjósa sér þing í dag. Í Austurríki er útlit fyrir að öfga-hægriflokkar bæti við sig fylgi. Forseti Hvíta-Rússlands gerir sér vonir um að kosningarnar í heimalandi hans verði vesturveldunum þóknanlegar.

Um snemmbúnar kosningar er að ræða í Austurríki eftir að samsteypustjórn Þjóðarflokksins og Sósíaldemókrata sprakk í sumar. Hún hafði aðeins starfað í eitt og hálft ár. Kannanir benda til að þessir tveir stærstu flokkar Austurríkis fái samanlagt innan við sextíu prósent atkvæða sem yrði í fyrsta sinn frá lokum Seinni heimsstyrjaldar. Því er helst spáð að tveir öfgahægriflokkar, Frelsisflokkurinn og Bandalag um framtíð Austurríkis, flokkur hins umdeilda Jörgs Heiders, bæti við sig töluverðu fylgi.

Kosningarnar í Austurríki í dag eru fyrir margt sögulegar. Tíu flokkar eru í framboði sem er met í Austurríki. Annað sem vekur athygli er að samkvæmt nýjum kosningalögum verður þetta í fyrsta sinn í Evrópusambandslandi sem ungmenni á aldrinum sextán og sautján ára fá að kjósa.

Í Hvíta-Rússlandi er kosið til neðri deildar þings. Þar sitja nú hundrað og tíu þingmenn sem allir eru bandamenn Alexanders Lúkasjenkós, umdeilds forseta landsins síðustu fjórtán árin. Hann bindur vonir við að kosningarnar nú hljóti blessun vesturveldanna og verði til að bæta samskipti hans við Bandaríkin og Evrópusambandið en ráðamenn í Washington hafa lýst Lúkasjenko sem síðasta einræðisherra Evrópu. Hann hefur verið sakaður um kosningasvik, ritskoðun og ofsóknir á hendur andstæðingum sínum.

Stjórnarandstæðingar hafa sameinast í tveimur fylkingum fyrir kosningarnar í dag. Flestir þeirra sniðgengu kosningarnar 2000 en stjórnarandstöðuflokkar buðu fram til þings 2004, án árangurs.