Gordon Brown er staurblindur

Þverrandi sjón Gordons Brown, forsætisráðherra Bretlands, er að verða áhyggjuefni aðstoðarfólks hans og fleiri samferðarmanna. Brown missti með öllu sjónina á öðru auganu í íþróttaslysi þegar hann var 16 ára. Sjónhimnan á hinu er sködduð og alls ekki útilokað að ráðherrann verði blindur með öllu fyrr en síðar.

Brown játar sjálfur í viðtali við breska blaðið Telegraph að hann kunni að koma hálfundarlega fyrir sjónir í ræðustól vegna sjónvanda síns, ekki síst vegna þess að lesi hann eitthvað af blaði þurfi hann að snúa höfðinu töluvert til hliðar svo sjáandi augað nýtist.

Ýmsir úr aðstoðarliði Browns hafa nefnt dæmi um það sem sjóndepurð ráðamannsins hefur í för með sér. Til dæmis séu öll minnisblöð sem hann skrifar á tölvu með 36 punkta letri og þreföldu línubili auk þess sem rithönd hans fari ört stækkandi. Eftir ræðu sem Brown hélt á vorþingi Verkamannaflokksins fór hann vitlausu megin af sviðinu og lenti í sjálfheldu þar sem hann fann engan útgang.

Tómlegt augnaráð og þvingað bros

Nýlega framkvæmdi forsætisráðherrann liðsskoðun hjá her hennar hátignar og þurftu menn þá að bregða skjótt við og kippa John Reid, fyrrum innanríkisráðherra Bretlands, til hliðar þar sem sýnt þótti að Brown myndi ekki gera greinarmun á honum og hermönnunum.

Þessar uppljóstranir eru tilraun til að útskýra undarlega framkomu ráðherra í viðtölum og á öðrum opinberum vettvangi þar sem hann starir oft að því er virðist tómlega fram fyrir sig og bregður upp þvinguðu brosi. „Þú skilur Gordon ekki nema þú getir sett þig í spor manns sem lifir í ótta við að verða staurblindur á hverri stundu," sagði vinur ráðherrans blaðamanni Telegraph.