Segja niðurskurð á RÚV aðför að fréttastofu - Ekki hægt að réttlæta ofurlaun Páls

Stjórn Félags fréttamanna á Ríkisútvarpinu sendir yfirstjórn stofnunarinnar og stjórnvöldum tóninn í yfirlýsingu sem send var út í kvöld. Eru stjórnvöld sökuð um vanhugsaða stefnu og æðstu stjórnendur RÚV hvattir til að deila kjörum með starfsmönnum.

Eins og kunnugt er var gripið til mikils niðurskurðar á Ríkisútvarpinu og um 40 föstum starfsmönnum og verktökum sagt upp fyrir helgi. Stjórn Félags fréttamanna átelur vinnubrögð stjórnvalda og harmar fjársvelti sem leitt hafi til þess að skera verður niður um fimmtung hjá Ríkisútvarpinu.

,,Hluti þess sparnaðar felst í því að fimmtán frétta- og tæknimönnum var sagt upp störfum á Fréttastofu Ríkisútvarpsins á föstudaginn. Þetta er rúmlega tíundi hluti allra sem þar unnu. Jafnframt á að minnka framlag innlendra og erlendra fréttaritara. Að teknu tilliti til fyrri uppsagna á árinu er ljóst að geta fréttastofunnar til faglegrar og vandaðrar umfjöllunar er verulega sködduð. Álag á fréttamenn var mikið fyrir. Nú eiga enn færri að skila sömu afköstum sem óhjákvæmilega kemur niður á gæðum," segir Félag fréttamanna.

Fréttastofu gert ókleift að sinna lögbundnu hlutverki sínu



Þá er yfirstjórn RÚV gagnrýnd fyrir að láta niðurskurðinn koma með svo sársaukafullum hætti niður á fréttastofunni. ,,Sameiginlega bera Alþingi, ríkisstjórnin og stjórnendur Ríkisútvarpsins fulla ábyrgð á því að veikja fréttastofuna. Henni er gert nær ókleift að sinna lögbundnu og lýðræðislegu hlutverki sínu á erfiðum tímum. Þetta gengur þvert á margendurteknar yfirlýsingar forsvarsmanna Ríkisútvarpsins, þ.m.t. fréttastjóra og útvarpsstjóra, um eflingu fréttastofunnar," segir stjórnin og segir aðgerðirnar aðför að fréttastofunni.

,,Sjaldan hefur verið meiri þörf á vönduðum og áreiðanlegum fréttum en nú. Þrátt fyrir þetta er máttur dreginn úr fréttastofunni með sparnaði og uppsögnum. Stjórn FF telur þetta álíka vitlaust og að reka slökkviliðsmenn í miðjum eldsvoða," segir enn fremur í ályktuninni.

Bílakostnaður útvarpsstjóra á við laun eins fréttamanns

Þá vilja fréttamenn fá upplýsingar um hvernig breyta eigi fréttatímum og þáttum fréttastofunnar þannig og hvetja stjórn RÚV til að kynna sér vinnuaðstöðu, verkferla og álag á fréttamönnum. ,,Jafnframt skorar stjórn FF á stjórn Ríkisútvarpsins ohf. að þiggja laun samkvæmt kjarasamningi fréttamanna en afsala sér að öðru leyti stjórnarlaunum og láta þau renna til eflingar fréttastofunnar," segir stjórnin.

Stjórn Félags fréttamanna hafnar allri skerðingu á kjörum og réttindum líkt og útvarpsstjóri hefur boðað. Það standist ekki lög. ,,Stjórn FF skorar á æðstu stjórnendur Ríkisútvarpsins að lækka eigin laun verulega og deila kjörum með þeim sem undir þeim vinna. Ekki er hægt að réttlæta ofurlaun hjá almannaútvarpi í ríkiseigu á meðan fólk er rekið í sparnaðarskyni.

Stjórn FF telur að auki augljóst að útvarpsstjóra ættu að duga einföld ráðherralaun til framfærslu. Muninn mætti nýta til að fjölga fréttamönnum og efla fréttastofuna. Að auki sér stjórnin ekki hvernig það samræmist almannaþjónustuhlutverki Ríkisútvarpsins að það greiði bílakostnað útvarpsstjóra sem nemur a.m.k . launum eins fréttamanns. Með sparnaði í yfirstjórn og launalækkun stjórnar og æðstu stjórnenda Ríkisútvarpsins mætti líklega draga allar uppsagnir á fréttastofunni til baka," segir í yfirlýsingu FF.