Ólöf leitar til lögfræðinga - Segir borgarstjóra misnota vald

Ólöf Guðný Valdimarsdóttir sem vikið var úr skipulagsráði Reykjavíkurborgar, vegna ummæla sem hún lét falla varðandi vinningstillögu Listaháskólans, ætlar að láta lögfræðinga skoða brottreksturinn. Hún furðar sig á því að borgarfulltrúar Sjálfstæðisflokksins skuli kyngja málinu þegjandi.

„Ég furða mig á því að eftir þau góðu samskipti sem ég hef átt við sjálfstæðismenn skuli þau kyngja þessu þegjandi og hljóðalaust. Mér finnst ég hafa átt inni smá þakklætisvott fyrir samvinnuna með þeim," segir Ólöf Guðný sem er allt annað en sátt við þá ákvörðun borgarstjóra að víkja sér úr skipulagsráði á þennan hátt.

Ólöf segir að í umræddu viðtali um vinningstillöguna sem birtist á Stöð 2 hafi hún sagt nákvæmlega það sama og Gísli Marteinn Baldursson borgarfulltrúi Sjálfstæðisflokks sagði um málið í sama viðtali. „Því finnst mér það skjóta skökku við að þau skuli kyngja þessu, ég reikna ekki með að þau séu með sérlega gott bragð í munninum."

Ólöf segir að sér hafi ekki verið gefin upp nein önnur ástæða fyrir brottrekstrinum en umrætt viðtal og segir málið aðallega vera ólýðræðislegt.

„Eins og þetta snýr að mér varðar þetta tjáningarfrelsið og lýðræðið í landinu, ef þetta er ekki bara lögbrot líka," segir Ólöf og nefnir að tveir mjög virtir lögfræðingar efist um réttmæti brottrekstursins.

Gerrræðisleg ákvörðun

„Ef Ólafur vildi losa sig við mig hefði hann getað gert það á lýðræðislegan og eðlilegan hátt. Þessi ákvörðun er hins vegar gerræðisleg, ólýðræðisleg og forsendurnar vega að tjáningarfrelsinu."

Ólöf segist að sjálfsögðu ætla að láta lögfræðinga skoða málið. „Þegar menn eru farnir að misnota vald sitt með þessum hætti finnst mér að almenningur eigi rétt á því að fá úr því skorið hvort mönnum sé það leyfilegt. Hvort þetta séu vinnubrögð sem við Íslendingar viljum í okkar lýðræðislega þjóðfélagi."