Húsleit hjá Stoðum

Starfsmenn skattrannsóknarstjóra fóru í dag á skrifstofu Stoða, sem áður hét FL Group, og óskuðu eftir afriti af bókhaldsgögnum félagsins síðastliðin þrjú rekstrarár. Stjórnendur og starfsmenn félagsins hafa veitt starfsmönnum skattrannsóknarstjóra umbeðnar upplýsingar og gögn og munu gera allt sem í þeirra valdi stendur til að auðvelda þeim vinnu sína. Þetta kemur fram í tilkynningu frá stjórn Stoða.

Í tilkynningunni segir að fá fyrirtæki hafi verið meira á milli tannanna á fólki en FL Group, bæði á uppgangstímum fyrri ára sem og síðustu misserin þegar félagið hafi háð mikla varnarbaráttu. Að mati stjórnarinnar hafi stór hluti umræðu um málefni félagsins einkennst af sögusögnum og vanþekkingu. Rannsókn skattrannsóknarstjóra sé því til þess fallin að eyða vafa um ákveðna þætti í rekstri félagsins sem sætt hafi gagnrýni.

Þá lýsa stjórn Stoða og stjórnendur yfir fullum vilja til samstarfs við starfsmenn skattrannsóknarstjóra og vonast til að málið gangi sem hraðast fyrir sig.