Niðurrif húsa við Mýrargötu hafið

Hafið er niðurrif húsa á slippasvæðinu við Mýrargötu, en þetta verk er hluti þeirra undirbúningsverka sem fylgja þróun og enduruppbyggingu Mýrargötu - Slippasvæðis.

Greint er frá málinu á vefsíðu Faxaflóahafna. Þar segir að unnið hafi verið að undirbúningi þessa máls síðustu árin, botn og strönd svæðis hefur verið hreinsuð og land fyllt fram.

Nú í vor hefst síðan gatnagerð á svæðinu og samhliða þurfa eldri byggingar og mannvirki að víkja. Verkið verður unnið í áföngum og samhliða víkur burt sú smiðju - og skipaviðgerðastarfsemi sem þessi hús hafa hýst svo lengi sem elstu menn muna.

Niðurrif húsanna við Mýrargötu var boðið út í lok síðasta árs og verktakinn, Abltak ehf hófst síðan handa við niðurrif húsa á lóðinni Mýrargata 10 -12 í lok mars. Þegar að þeim verkáfanga lýkur hefst síðan niðurrif húsa á lóðinni Mýrargata 22, en þar er í dag smiðjustarfsemi Stálsmiðjunnar ehf til húsa.

Reiknað er með að verklok verði um mitt sumar og ásýnd svæðis þá orðin talsvert breytt frá því sem að hún áður var.