Vilja aukna fjármuni til lögreglunnar á Suðurnesjum

Þrír þingmenn vinstri - grænna hafa lagt fram frumvarp til fjáraukalaga þar sem gert er ráð fyrir að 600 milljónir króna til viðbótar verði veittar til löggæslumála á þessu ári. Þriðjungur, eða 200 milljónir, er hugsaður fyrir lögregluna á höfuðborgarsvæðinu en afgangurinn er ætlaður landsbyggðinni, ekki síst lögreglunni á Suðurnesjum.

Þingmennirnir benda á að þeir hafi lagt fram sams konar tillögu fram við vinnslu fjárlagafrumvarps fyrir árið 2008 en þingmenn ríkisstjórnarflokkanna hafi fellt hana. ,,Flutningsmenn telja að þetta frumvarp leiðrétti mistök sem gerð voru við fjárlagagerðina, enda var upphaflega breytingartillagan lögð fram á sínum tíma vegna staðfestra frétta af fjársvelti lögreglunnar og niðurskurði í rekstri hennar. Ástandið hefur því miður ekki skánað og stöðugar fréttir hafa borist af manneklu og skerðingu löggæslu, ekki síst á Suðurnesjum," segir í greinargerð með frumvarpinu.

Algjör öngþveiti að skapast hjá löggæslunni vegna fjárskorts

Þar segir enn fremur að algjört öngþveiti sé að skapast hjá löggæslunni í landinu vegna fjárskorts og skipulagsleysis. Sameinuð tollgæsla, öryggisvarsla og flugvernd lögreglu og landamæragæsla á Suðurnesjum hafi gefist vel að mati þeirra sem þar starfa. Þessum verkefnum eigi nú að sundra á hin ýmsu ráðuneyti í sparnaðarsyni og án þess að nokkur greining á málinu hafi farið fram. Félög löggæslumanna hafi mótmælt þessum vinnubrögðum harðlega.

Bent er á að fjármagsþörf lögreglunnar á Suðurnesjum hafi aukist í tengslum við vaxandi umferð fólks og síaukna vöruflutninga um flugvöllinn og vegna aukins eftirlits með innflutningi fíkniefna. Engu að síður hafi starfsfólki í þessum störfum verið fækkað. Með frumvarpinu segja þingmenn Vinstri hreyfingarinnar - græns framboðs tekið er á brýnasta fjárhagsvanda löggæslunnar í landinu.