„Ákveðin formsatriði ekki uppfyllt“

Geir Þorsteinsson formaður KSÍ segist fagna skýrslu Innri endurskoðunar Reykjavíkurborgar vegna framkvæmda við Laugardalsvöll og hann segir hana mjög gagnlega. Geir átti sæti í byggingarnefndinni sem skipuð var í tengslum við bygginguna en sú nefnd hélt aðeins tvo formlega fundi. Verkið fór mörghundruð milljónir fram úr áætlun. Eggert Magnússon, fyrrverandi formaður KSÍ var formaður nefndarinnar en hann segist ekki vilja tjá sig um málið fyrr en hann hefur séð skýrsluna. Hann svarar því ekki hvers vegna aðeins var boðað til tveggja funda.

„Það er mjög góð spurning," segir Geir Þorsteinsson, formaður Knattspyrnusambands Íslands, aðspurður hvers vegna ekki hafi verið haldnir fleiri fundir í nefndinni. „Það voru mistök miðað við það sem fram kemur í skýrslunni. Við munum skoða þessi mál og taka ábyrgð á því sem á okkur stendur," segir Geir. Hann segir skýrsluna gagnlega. „Hún leiðir í ljós að þeim fjármunum sem um var að ræða var varið í verkið. Hins vegar sýnir hún einnig að ákveðin formsatriði voru ekki uppfyllt."

Í skýrslunni kemur meðal annars fram að í apríl 2006 hafi KSÍ kynnt Framkvæmdasviði borgarinnar uppfærða kostnaðaráætlun við verkið. Síðari fundurinn í byggingarnefnd var haldinn 3. apríl 2006 og því segir skýrsluhöfundur að ljóst hafi mátt vera á þeim fundi að kostnaðurinn við verkið stefndi fram úr áætlun. Það var hins vegar ekki rætt á fundinum. Geir segist ekki tilbúinn til að svara því hvers vegna þetta hafi ekki verið rætt á fundi byggingarnefndarinnar. Hann segir hins vegar að allir sem að málinu komu hafi vitað af því að það stefndi í aukinn kostnað. Það vissu það allir á þeim tíma," segir Geir.

Eggert Magnússon, fyrrverandi formaður KSÍ og formaður Byggingarnefndarinnar segist ekki hafa séð skýrslu Innri endurskoðunar og því geti hann ekki tjáð sig um málið. Hann vildi heldur ekki svara því hvernig á því stóð að hann sem formaður byggingarnefndarinnar boðaði einungis til tveggja funda á öllum framkvæmdatímanum. „Allt sem KSÍ gerði í þessu máli var gert á sem hagkvæmastan hátt og hægt var á hverjum tíma," segir Eggert í samtali við Vísi. „Við gerðum allt eftir bestu getu og eitthvað pólitískt írafár kemur mér því mjög á óvart." Eggert segist vera mjög stoltur af stúkunni. „Við náðum í fullt af peningum erlendis frá og frá ríkinu og við unnum þetta mál af sömu vandvirkni og við gerðum þegar hin stúkan var byggð við völlinn. Í því verkefni var okkur hrósað í hástert svo þetta mál núna kemur mér á óvart."