Hvaða lið er þetta Huddersfield?

Það er um fátt annað rætt en knattspyrnuliðið Huddersfield á Englandi þessa stundina. Ástæðan? Jú, Davíð Oddsson seðlabankastjóri nefndi klúbbinn í svari á blaðamannafundi Seðlabankans í morgun.

Höskuldur Kári Schram fréttamaður á Stöð 2 spurði Davíð út í stöðu Vilhjálms í borginni. Davíð svaraði því með spurningu og spurði að bragði hvað honum fyndist um stöðu Huddersfield í ensku knattspyrnunni.

Það eru kannski ekki margir sem þekkja þetta fornfræga félag. Huddersfield er enskt félagslið, stofnað árið 1908 og kemur frá Huddersfield í vestur Jórvíkurskíri. Liðið spilar nú í fyrstu deildinni og er í fimmtánda sæti. Stjóri þeirra er Andy Ritchie sem lék á árum áður með Manchester United.

Árið 1926 tókst liðinu að vinna þrjá meistaratitla í röð sem er árangur sem aðeins þrjú önnur lið geta státað sig af.

Liðið er oftast kallað, The Terriers, og heitir lukkudýr félagsins Terry the Terrier. Liðið spilar í hvítum og bláum búningum og helstu andstæðingar þeirra eru Leeds United og Bradford City. Liðið er þekkt fyrir að ala af sér efnilega unga leikmenn.

Margir velta fyrir sér þessari líkingu Davíðs og má lesa margt út úr orðum seðlabankastjórans.

Huddersfield leikur í hvítum og bláum búningum sem er einmitt litur Sjálfstæðisflokksins. Í merki félagsins er hundur en Sjálfstæðisflokkurinn sækir að sjálfsögðu innblástur í dýraríkið í sínu merki, með fálkanum.

Ungliðastarf Sjálfstæðisflokksins hefur einnig þótt öflugt í gegnum tíðina og hefur flokkurinn alið af sér marga unga efnilega liðsmenn líkt og Huddersfield.

Eins og fyrr segir er Huddersfield í fimmtánda sæti ensku fyrstu deildarinnar en borgarfulltrúarnir eru einmitt fimmtán.

Liðið er með ömurlega markatölu eða 13 mörk í mínus. Þó er ekki vitað hve mörg sjálfsmörk liðið hefur skorað á leiktíðinni.

Huddersfield hefur verið á góðu róli undanfarnar vikur og var búið að vinna fjóra leiki í röð en liðið tapaði um helgina.

Síðan getur líka vel verið að Davíð hafi bara nefnt eitthvað lið.