Bolvíkingar styðja Súðvíkinga í baráttu fyrir jarðgöngum

Bæjarráð Bolungarvíkur tekur heilshugar undir með sveitastjórn Súðavíkur þar sem skorað er á ríkisstjórn Íslands að hefja nú þegar undirbúning að gerð jarðganga á milli Álftarfjarðar og Skutulsfjarðar.

Þetta kemur fram í bókun sem samþykkt var á fundi ráðsins í gær. „Hættan á ofanflóðum í Kirkjubólshlíð og Súðavíkurhlíð er óásættanleg eins og nýleg dæmi undirstrika svo rækilega. Minnt er á að þessi leið er hluti af vegi sem tengir norðanverða Vestfirði við þjóðveg eitt," segir enn fremur í bókuninni.

Bolvíkingar þekkja vána sjálfir því þeir hafa sjálfir þurft að aka Óshlíð þar sem snjóflóða- og skriðuhætta er mikil. Hins vegar hefur verið samþykkt að ráðast í göng á milli Bolungarvíkur og Hnífsdals og hefjast framkvæmdir við þau á næstunni.