40.000 króna aukakostnaður á hverja fjölskyldu

Gengi krónunnar og heimsmarkaðsverð skýra hækkun eldsneytisverðs að undanförnu einungis að hluta til. Þetta kom fram í máli Runólfs Ólafssonar, formanns Félags íslenskra bifreiðaeigenda, í hádegisviðtalinu á Stöð 2 í dag.

Runólfur segir að álagning olíufélaganna á hvern seldan bensínlítra hafi aukist um allt að fimm krónur á síðasta ári. Runólfur segir skýringu á hærri álagningu meðal annars vera þá að nýir eigendur hafi komið að olíufélögunum á síðastliðnum árum og þeir hækki álagningu til að fjármagna fjárfestingar sínar.

Runólfur segir að eldsneytishækkanir á síðasta ári séu um fjörutíu þúsund króna aukakostnaður fyrir hverja fjölskyldu eftir skatt, sem þýði að fólk þurfi að vinna sér inn 70 þúsund krónur til að mæta hærra eldsneytisverði. Þá benti Runólfur á ábyrgð íslenskra stjórnvalda, en um það bil helmingur af hverjum seldum bensínlítra rennur í ríkissjóð. FÍB sendi forsætisráðherra og fjármálaráðherra bréf í morgun þar sem óskað var eftir því að stjórnvöld gripu inn þróun eldsneytisverðs.