Hægt miðar í kjaraviðræðum en miðar þó

Hægt miðar í kjaraviðræðum Starfsgreinasambandsins og Samtaka atvinnulífsins en miðar þó eftir því sem fram kemur í frétt á vef sambandsins.

Þar segir einnig að viðræðunefnd sambandsins hafi í dag og í gær farið yfir tilboð atvinnurekenda varaðandi launaliði og stöðuna almennt í kjaraviðræðunum. Þá funduðu formenn landssambanda ASÍ og stærstu félaga, þ.e. Eflingar, Einingar-Iðju og Afls auk VR, og ræddu möguleika á sameiginlegum launaramma aðildasambanda ASÍ gagnvart atvinnurekendum.

Hugmyndir ASÍ voru kynntar forystu SA síðdegis og þá voru áherslur ASÍ gagnvart ríkinu vegna aðkomu þess að lausn kjaradeilunnar ræddar á vettvangi sambandsins. Viðræðum um kröfur á sameiginlegu borði ASÍ verður haldið áfram á morgun og þá mun Starfsgreinasambandið einnig funda um sín sérmál gagnvart SA.

Enn fremur er gert ráð fyrir að viðræður um launaramma og launakröfur SGS og Flóafélaganna í því sambandi hefjist á morgun og verði fram haldið á fimmtudag til lausnar deilunni.