Dyravörður á skilorði dæmdur fyrir að berja feðga

Fyrrverandi dyravörður á Kaffi Viktor var í héraðsdómi Reykjavíkur í morgun dæmdur til fimm mánaða fangelsisvistar. Fjórir mánuðir af þeim eru þó skilorðsbundnir. Dyravörðurinn fyrrverandi réðist að feðgum fyrir utan skemmtistaðinn í semptember 2006.

Feðgarnir sátu við borð fyrir utan staðinn þegar dyravörðurinn réðist að þeim. Hann hristi stól föðurins, tók hann hálstaki og henti honum í gangstéttina. Síðan beit hann í vísifingur vinstri handar hans með þeim afleiðingum að 1 cm langur skurður myndaðist. Því næst tók hann soninn hálstaki, kýldi hann hnefahöggi í andlit þannig að hann féll í götuna og rotaðist. Hlaut hann 2 cm langan skurð á vinstri kinn, skurð innan á vinstri vör og skurð á höku.

Dyravörðurinn fyrrverandi neitaði fyrir dómi að hafa ráðist á feðgana með fyrrgreindum hætti, hann hefði hvorki bitið né kýlt í andlit, tekið menn hálstaki eða hrist stóla.

Á sakarvottorði dyravarðarins kemur fram að hann hlaut skilorðsbundinn dóm vegna líkamsárársar og vopnalagabrota þann 30.október 2006. Kemur þar fram að refsing hans hafi verið ákveðin tveggja mánaða fangelsi, skilorðsbundið í þrjú ár.

Við athugun kemur hinsvegar í ljós að refsingin er ranglega tilgreind á vottorðinu. Hið rétta er að honum var gert að sæta fangelsi í 6 mánuði og þar af voru fjórir bundnir skilorði til þriggja ára.

Með tilliti til þessa og að árásin er talin tilefnislaus var hann dæmdur í fimm mánaða fangelsi og þar af fjóra skilorðsbundið. Honum var einnig gert að greiða mönnunum skaðabætur.