Leit hafin að nýju

Flugvél frá danska flughernum hélt frá Keflavíkurflugvelli klukkan átta í morgun til leitar úr lofti að flugvélinni, sem brotlenti vestur af Reykjanesi síðdegis í gær, en leit úr lofti var hætt um klukkan hálfníu í gærkvöldi. Leit dönsku vélarinnar verður stjórnað frá varðskipinu Ægi sem leitaði í nótt ásamt þremur togurum.

Leit þeirra bar engan árangur og aldrei hefur heyrst í neyðarsendi vélarinnar. Leitarskilyrði eru afleit, sex til átta metra ölduhæð og gengur á með hvössum og dimmum éljum. Af öryggisástæðum verður Fokker-vél Landhelgisgæslunnar því ekki send á leitarsvæðið fyrr en klukkan tíu, en þá fer danska vélin aftur til Keflavíkur.

Vélin, sem brotlenti, var að koma frá Bandaríkjunum og hafði millilent í Narsarsuak á Grænlandi. Flugmaðurinn, er breskur og er talið að ferðinni hafi verið heitið til Englands, eftir viðkomu í Reykjavík.