Viðbúnaðarstig á Vestfjörðum - bílum fylgt um Súðavíkurhlíð

Viðbúnaðarstigi hefur verið lýst yfir á Vestfjörðum vegna snjóflóðahættu en þar hafa nokkur snjóflóð fallið í dag.

Fram kemur í tilkynningu frá almannavörnum að samhæfingarmiðstöð almannavarna hafi verið virkjuð. Þar eru nú að störfum aðilar frá svæðistjórn og landstjórn björgunarsveita, slökkviliði, lögreglu, fjarskiptamiðstöð ríkislögreglustjóra auk starfsmanna almannavarnadeildar.

Óskir um aðstoð eru farnar að berast og eru fjórir hópar frá björgunarsveitunum að störfum í Grindavík, Keflavík og á höfuðborgarsvæðinu auk slökkviliðsmanna og lögreglu. Sinna þeir verkefnum vegna foks og vatnssöfnunar. Allt innanlandsflug liggur niðri vegna óveðursins.

Þá segir í tilkynningu frá Vegagerðinni að bílum verði fylgt um Súðavíkurhlíð fljótlega. Farið verður frá Ísafjarðarflugvelli klukkan hálffimm og svo frá Súðavík til Ísafjarðar um hálf sexleytið en síðan verður vegurinn hafður lokaður áfram vegna snjóflóðahættu. Auk Súðavíkurvegar eru Óshlíðarvegur og Eyrarhlíðarvegur lokaðir.