Ríkislögreglustjóri fær gögn hjá skattrannsóknarstjóra

Hæstiréttur hefur fallist á kröfu efnahagsbrotadeildar Ríkislögreglustjóra um heimild til húsleitar hjá skattrannsóknarstjóra í tengslum við rannsókn á málum Óskars Magnússonar, fyrrverandi stjórnarformanns Baugs. Þar staðfesti Hæstiréttur úrskurð héraðsdóms frá því í janúar en Hæstiréttur klofnaði í málinu.

Ríkislögreglustjóri hafði óskað eftir því að skattrannsóknarstjóri afhenti honum upplýsingar um skattamál sem tengjast Baugsmálinu. Þeirri ósk synjaði skattrannsóknarstjóri á þeim grundvelli að það væri skattrannsóknarstjóra að rannsaka meint brot á skattalögum og yfirskattanefndar að úrskurða um sektir nema þegar máli væri vísað til opinberrar rannsóknar hjá lögreglu.

Hæstiréttur klofnaði

Ríkislögreglustjóri fór með málið fyrir dóm sem komst að því að lögregla hefði heimild til að leita hjá skattrannsóknarstjóra. Að sögn Bryndísar Kristjánsdóttur skattrannsóknarstjóra klofnaði Hæstiréttur í afstöðu sinni. Þrír dómarar töldu að það væri ekkert sem takmarkaði vald lögreglu til þess að fá gögn sem þessi en tveir dómarar töldu að skattrannsóknarstjóra bæri að meta hvort vísa bæri málum till lögreglu.

Gæti þýtt stefnubreytingu og fleiri mál til lögreglu

Aðspurð um þýðingu þessa dóms segir Bryndís að gögnin verði afhent. Hvað almenna þýðingu varði búist hún við að fleiri málum verði vísað til lögreglu en nú er gert og lögregla fái því fleiri mál á sína könnu.

Við ákvörðun um hvort málum sé vísað til lögreglu hafi skattrannsóknayfirvöld horft til ýmissa mála. „Þessi dómur gæti þýtt að öllum málum sem varða 262. grein hegningarlaga (sem snýr að skattalagabrotum) verði vísað till lögreglu. Það úrræði að ljúka málum hjá skattrannsóknarstjóra eða yfirskattanefnd verði þá undantekning frekar en hitt," segir Bryndís og bendir á að þessu hafi hingað til verið öfugt farið. Þetta gæti því þýtt ákveðna stefnubreytingu.

Óskar Magnússon, fyrrverandi stjórnarformaður Baugs, vildi ekki tjá sig um málið þegar eftir því var leitað.