Fartölvum sem stolið var í FSu komið til skila

Fartölvur sem stolið var úr Fjölbrautaskóla Suðurlands komu í leitirnar eftir að athugulir menn lásu um þjófnaðinn í héraðsblöðunum á Selfossi.

Fram kemur í tilkynningu lögreglunnar á Selfossi að tveimur fartölvum hafi verið stolið úr skólanum í síðustu viku og var greint frá því í héraðsblöðum. Í gærkvöldi fékk lögregla svo ábendingu í málinu og voru fjórir unglingsdrengir handteknir í kjölfarið. Tölvurnar fundust hjá tveimur drengjanna.

Drengirnir voru yfirheyrðir og hafa viðurkennt að hafa stolið tölvunum. Málið er upplýst og eigendur munu fá fartölvurnar sínar í hendur en ekki er víst að gögninn sem áttu að vera inni á þeim séu enn til staðar.