Bræður áfrýja og dómari kærir

Bræður á Akureyri hafa áfrýjað sektarómi héraðsdóms í netbankamáli Glitnis. Dómari við Héraðsdóm Norðurlands eystra vill fjórar milljónir í bætur vegna ummæla sem féllu í fréttum Stöðvar 2 eftir dómsuppsögu.

Annars vegar var sambýlisfólk á Akureyri dæmt í skilorðbundið fangelsi og hins vegar bræður eftir gjaldeyrisviðskipti í netbanka Glitnis. Sambýlisfólkið, kona og karl, ákváðu að una dómi héraðsdóms Norðurlands eystra en bræðurnir Þorsteinn Hjaltason lögmaður og bróðir hans Jón Hjaltason söguritari Akureyrarbæjar hafa áfrýjað. Þorsteinn sagði í samtali við fréttastofu í dag að þeir væru saklausir og þess vegna áfrýjuðu þeir. Glitnismálið hafi snúist um hvort tilboð geti verið það gott að glæpsamlegt sé að taka því vegna þess að það hljóti vera of gott til að vera satt. Eða hvort maður hafi rétt til þess að taka óhræddur öllum tilboðum, sem bjóðast á netinu eða annars staðar, alveg sama hve góð þau eru og ef ekki, hvar mörkin liggi.

Þorsteinn lögmaður stendur nú í öðru máli sem tengist Glitnismálinu. Ásgeir Pétur Ásgeirsson dómari hér við Héraðsdóm Norðurlands eystra hefur kært hann vegna ummæla sem Þorsteinn lét falla í kjölfar dómsins í fréttatíma Stöðvar 2. Dómarinn, sem hætti störfum hér um áramótin fyrir aldurs sakir, krefst 4 milljóna króna í skaðabætur fyrir það sem hann telur meiðandi ummæli, þegar Þorsteinn svaraði því aðspurður að hann teldi ægivald Glitnis hafa haft áhrif á ríkislögreglustjóra og dómarann.