Fjórir handteknir vegna árásar í Keflavík

Rétt fyrir klukkan fimm í morgun brutust út slagsmál fyrir utan skemmtistaðinn Yello í Keflavík. Þegar lögregla mætti á staðinn lá einn óvígur í götunni og var hann fluttur með sjúkrabifreið á Heilbrigðisstofunun Suðurnesja til skoðunar hjá lækni.

Að læknisskoðun lokinni fékk hann að fara heim. Fjórir voru handteknir vegna málsins og gista þeir nú fangageymslur lögreglunnar á Suðurnesjum. Á einum þeirra fundust ætluð fíkniefni.

Það var síðan rétt fyrir miðnætti í gærkvöldi að tilkynnt var um bílveltu á Grindavíkurvegi. Er lögreglan kom á vettvang var ökumaður kominn út úr bifreiðinni og beið eftir lögreglu og sjúkrabifreið í annarri bifreið sem átti leið hjá. Ökumaður var fluttur með sjúkrabifreið til Reykjavíkur til skoðunar hjá lækni. Ökumaður var vankaður eftir veltuna og má teljast nokkuð heppin að sleppa svo vel frá. Bifreiðin er gjörónýt og var flutt af vettvangi með kranabifreið.