Samiðn lýsir vonbrigðum með ríkisstjórnina

Samninganefnd Samiðnar vill að skattkerfið verði notað í auknum mæli til jöfnunar í samfélaginu og lýsir yfir miklum vonbrigðum með það að ríkisstjórnin hafi ekki séð sér fært að mæta óskum stéttarfélaganna um að boðaðar skattalækkanir verði fyrst og fremst nýttar til að lækka skatta á lægstu tekjur.

Í yfirlýsingu sem samþykkt var á fundi samninganefndarinnar í dag lýsir Samiðn einnig yfir vonbrigðum með að ríkisstjórnin skuli ekki strax ganga til starfs við stéttarfélög um að koma á stöðugleika í íslensku efnahagslífi. Bent er á að á síðustu árum hafi ójöfnuður farið vaxandi hér á landi og nú sé svo komið að djúp gjá hafi myndast á milli almennings og þess hóps sem veit ekki aura sinna tal. Mikivægt sé að nota skattkerfið til jöfnunar í samfélaginu en frá því hafi verið horfið undnafarin ár.

Samiðn bendir á að óstöðugleikinn í íslensku efnahagslífi, þar á meðal vaxandi verðbólga og háir vextir, komi verst niður á skuldsettum fjölskyldum og ekki síst lágtekjufólki sem þurfi að ráðstafa stórum hluta launa sinna í að greiða af verðtryggðum húsnæðiskuldum.

„Samninganefnd Samiðnar gerir kröfu til stjórnvalda að þau beiti markvissum aðgerðum til að hér á landi komist á efnahagslegur stöðugleiki og skapaðar verði forsendur til bættra lífskjara. Reynslan segir okkur að eina leiðin til að ná tökum á verðbólgu og efnahagslegum óstöðugleika er traust og markvist samstarf aðila vinnumarkaðarins og stjórnvalda," segir að lokum í yfirlýsingu Samiðnar.