Tillaga Sjálfstæðismanna samþykkt í Hverfisráði Breiðholts

Það var tillaga frá Sjálfstæðismönnum sem samþykkt var samhljóða í gærkvöldi í Hverfisráði Breiðholts um breytingar á gatnamótum Bústaðavegar og Reykjanesbrautar.

Tillagan gerir ráð fyrir að gatnamótum Bústaðavegar og Reykjanesbrautar verði breytt þannig að gerð verði aukaakrein meðfram Reykjanesbraut í norður sem liggur í göng undir Reykjanesbrautina.

„Þá verði jafnframt gert hringtorg fyrir ofan Sprengisand og grænt svæði við íbúðabyggð austast í Fossvogi stækkað. Áhersla verði lögð á umhverfisvæna lausn sem tekur mið af því að í næsta nágrenni eru Elliðaárnar. Tillögunni verði vísað til umhverfisráðs og stjórnar Eignasjóðs borgarinnar," segir í tillögunni.

Í greinargerð með tillögunni kemur m.a. fram að breytingin muni auka umferðaröryggi, draga úr slysatíðni og leiða til þess að umferðin verður greiðari í báðar áttir.