Ekki var farið að reglum í ákveðnum tilfellum

Forsvarsmenn VALITORS, sem áður var Greiðslumiðlun, viðurkenna að ekki hafi verið farið að reglum í ákveðnum tilfellum á árunum 1995-2006, en félagið var ásamt tveimur öðrum sektað um samtals 735 milljónir fyrir samkeppnisbrot.

VALITOR þarf eitt að greiða 385 milljónir króna í stjórnvaldssekt til ríkissjóðs en félagið leitaði sjálft eftir sáttum við Samkeppniseftirlitið eftir húsleit stofnunarinnar í fyrra.

Greiðslumiðlun var talin hafa misnotað markaðsráðandi stöðu sína til að hindra innkomu danska félagsins PBS inn á greiðslukortamarkað og átt í ólöglegu samráði við tvö önnur fyrirtæki á greiðslukortamarkaði, Kreditkort og Fjölgreiðslumiðlun.

Fram kemur í tilkynningu frá VALITOR að þegar hafi verið brugðist við öllum ábendingum Samkeppniseftirlitsins um það sem betur megi fara í skipulagi fyrirtækisins.

Höskuldur H. Ólafsson, sem tók við stöðu forstjóra VALITOR fyrir rúmu ári, segir ljóst að ekki var farið eftir reglum í ákveðnum tilfellum á þeim árum sem voru til rannsóknar. „Rannsóknin leiðir í ljós að hvorki söluaðilar né korthafar hafa borið skaða af þessum brotum. Í kjölfarið höfum við fengið skýrar leikreglur og ábendingar frá Samkeppniseftirlitinu sem við höfum lagað okkur að.

VALITOR segir að með sáttinni fallist Samkeppniseftirlitið á að málinu sé að fullu lokið gagnvart fyrirtækinu.