Björguðu hundi úr Rauðavatni

Slökkviliðið var kallað að Rauðavatni á fimmta tímanum í dag til að bjarga labradorhundi úr vatninu. Hundurinn hafði verið á göngu með eiganda sínum umhverfis vatnið en hljóp út á þunnan ís á yfirborði vatnsins án þess að gæta að sér. Ísinn brotnaði undan hundinum og hann gat sér litla björg veitt eftir að hann féll ofan í vatnið. Slökkviliðið beitti sérstökum ísbjörgunarbúnaði, sem er ætlaður fólki, til þess að koma hundinum á þurrt og tóku björgunaraðgerðir ekki nema 15 mínútur. Hundinum varð ekki meint af volkinu.