Enn í varðhaldi vegna Hringbrautarmorðsins

Maðurinn sem grunaður er um að hafa orðið nágranna sínum að bana við Hringbraut í október er enn í gæsluvarðhaldi. Að sögn Friðriks Smára Björgvinssonar yfirlögregluþjóns er beðið eftir niðurstöðum krufningar og því ekki hægt að ákæra strax. „Hennar hefur verið beðið nánast alveg frá andláti mannsins," sagði Friðrik Smári í samtali við Vísi. Friðrik Smári segist vonast til þess að niðurstöðurnar fari að skila sér.

Það var hinn 7. október sem maður fannst rænulaus og illa leikinn í íbúð sinni við Hringbraut í Reykjavík. Hann lést fáeinum stundum síðar af sárum sínum á gjörgæsludeild. Fljótega vaknaði grunur um að 38 ára gamall nágranni mannsins hafi ráðist á hann með slökkvitæki að vopni og veitt honum áverkana. Maðurinn hefur hins vegar neitað sök.